Lunglei, 2026 Ramtuk thla ni 19: Vawiin khan Lunglei District Disaster Management Authority (DDMA) leh National Disaster Response Force (NDRF) ṭang kawp huaihawtin Lungleiah lirnghing vanga chhiatna lo thlen thulha felfai zawka chet lak dan tur en chhinna, "Mock Exercise on Earthquake" buatsaih niin, Lunglei Venglaia kawng chung lei (Flyover Bridge) leh a chhehvel Art & Culture building leh mimal in leh dawrah te lirnghing vanga chhiatna thleng angin lemchan a ni.
Lunglei Bawrhsap pisaa District Emergency Operation Centre (DEOC)-ah zing dar 11:00-ah lirnghing vanga Lungleia chhiatna thlen thu dawn a nih rualin chhiatna thlen hriattirna (disaster siren) tihrik niin, mock exercise hi ṭan a ni a. Lirnghing vanga chhiatna hrang hrang thleng karah Lunglei Venglai Traffic Point bawr vel chu chhiatna thlenna pui deuh anga lantirin, in chim, lei chim, inkal pawhna kawng chhia leh kangmei chhuak kara chhanchhuah hna thawh dan leh chet lak dan tur a taka chan chhin a ni.
Responsible Officer (RO) & Additional Deputy Commissioner Pi Rochuangkimi Khenglawt chuan mock exercise hi vilin, line department hrang hrang aṭanga nodal officer-te'n an team ṭheuh an vil bawk a. Treasury Office kawt chu chhanchhuah hna thawhnaa hman tur khawl leh mihring innghahna hmunpui (Staging aarea) atan ruahman niin, Sub-Divisional Officer (Sadar) Pi TT Beikhaizi chu Staging Area Manager a ni a. Chhiatna thlenna hmunah Sub-Deputy Commissioner Pi Lalhlimpuii Pachuau chu Incident Commander niin, PWD Office Complex-a hliam tuarte leh chhiatna tawkte awm lailawkna (Relief Camp) ruahmanah PWD Lunglei Road Division-I Sr Executive Engineer Er SR Lalramthanga chu Relief Camp In-charge a ni thung a. Civil Hospital Lunglei chu mitthi leh hliam tuarte sawngbawlna leh enkawlna atan hman a ni bawk.
He mock exercise-ah hian chhiatna thlen thu hriat a nih rualin Incident Commander bakah, chhanchhuah hna thawktu leh chhawmdawl hna thawktu tur team hrang hrangte chu a tahtawlin Staging Area aṭanga tirh chhuah an ni a. Chhiatna thlen veleha mipui insaseng dan tur te; chhiatna thleng chungchang thuneitute hnena hriattir thuai dan tur te; Incident Commander kaihhruaina hnuaia quick response team (QRT) leh chhiatna thlenna bul hnaia awm khawtlanga tlawmngai pawlte'n chhanchhuah hna an thawh nghal dan tur te; police lamin lirthei tlan dan an thunun a, chhiatna thlenna hmun an ven dan tur te; chhanchhuah hna thawktu, kang ṭhelhtu leh line department hrang hrangin an mawhphurhna an hlen dan tur te; chhanchhuaktu pawl lian zawk disaster response force (DRF) te hmanraw chi kim nen an lo thlen huna an chet lak dan tur te; hliam tuarte'n damdawia enkawlna an dawn thuai theih nana medical team-in an tih tur leh mitthi, damlo enkawl hmasak ngai leh na vak lote thliar dan tur leh damdawi in leh relief camp-a phurh dan tur te leh chhawmdawl hna thawh dan tur hrang hrang te a tak ang thei ber tura zir chhin a ni.
He mock exercise-ah hian DDMA member-te leh line department hrang hrang —DC, DM&R, Police, MPRO, H&FW, PWD, P&E, PHE, Supply, DTO, I&PR leh Art & Culture-a thawktute; chhanchhuah hna thawktu NDRF, 2nd MAP SDRF, Fire & Emergency Services, BSF, Assam Rifles, Sub-Headquarters YMA Quick Response Team leh tlawmngaia inpe zirlai naupang Aapda Mitra te; Sub-Headquarters YMA, Venglai leh Bazarveng khawtlang hruaitu leh YMA member-te'n mawhphurhna hrang hrang lain, mahni mawhphurhna ṭheuhte a ṭha thei ang bera hlen chhuak turin theih tawp an chhuah hlawm a ni.
Lunglei DDMA Chief Executive Officer Pi Rochuangkimi Khenglawt chuan mock exercise hlawhtling tak buatsaih a nih theih nana tha leh hmanrua thawhtu zawng zawng chungah leh ṭha taka thuneitute thawhpuitu Lunglei mipuite chungah lawm thu a sawi.
