TURNIPUI DT. 22.01.2026 : Vawiin khan S.A.D. Conference Hall, MINECO ah State level Sub-Committee on Fire Prevention chuan kumina Fire Prevention week hman dan tur an rel a, March ni 15 aia tlai lovah lo hal zawh ni se tiin; Lengpui leh a chhehvela lo hal turte tan, tlai lam thlawhna thlawkchhuak leh tum hnuhnung ber hnu lamah chauh hal tura tih a ni.
Meeting chuan kumin atan February ni 9 atanga ni 13 chu Fire Prevention Week atan hman ni se an ti a, ni 9 ah a hawnna hun hman tur a ni ang. Kum 2026 Fire Prevention Week thupui atan “Nungchate chenna leh tui thianghlim min petu ramngaw kangmei lakah venghim rawh” tih chu thlan a ni.
Pu Lalthansanga, Chairman State Level Sub-Committee on Fire Prevention leh Minister EF&CC ni bawk chuan kan ramngaw derdep takte kangmei laka venhim nasat a tulzia sawiin, Ecological balance vawnhim nana kangmei ven leh a hun taka chet lak leh inhmakhua lawk hi a pawimawh a ni, a ti.
