Dt. 14th January, 2026 Aizawl : Aizawl District Congress Committee (ADCC) hruaitute chuan vawiin khan Aizawl Press Club-ah thuthar thehdarhtute kawmin, BJP sorkarin MGNREGA thlak nana G-RAM-G a kalpui chu ṭha lo an tih thu leh a ngai anga kalpui leh an duh thu an sawi a, MGNREGA a tawp chuan hnathawh tur nei lo an pung dawn an ti.
ADCC President Lalhmingthanga Pachuau chuan MGNREGA hi kum 2006 a hman ṭan anih aṭangin mi vbc 180 chuang inhlawhna siam a ni tawh a, chhungkaw vbc 4 point 6 in an chhawr tawh a, kawng leh tuizem vbc 10 chuang siam a ni tawh an ti a, kum 20 chhung India rama thingtlang mite innghahna MGNREGA tihtawp a nita chu pawi an tih thu a sawi.
MGNREGA chu CAG Audit telin zirchianna vawi 200 chuang paltlang tawh a nih thu leh project hlawhtling leh nghawng nei ṭha ber zinga mi a ni tih hmuhchhuah a nih thu Lalhmingthanga chuan a sawi a, hei vang hian Modi-a sorkar hian tihtawp an duh hle a ni tih an thiltih hian a ti lang a ni, a ti bawk.
Modi sorkar chuan dan anga inhlawhna Central sorkarin a pek chu ti tawpin kuthnathawktute tana innghahna ṭha tak chu a tihtawp sak ta tih Lalhmingthanga chuan sawiin, mipuite chu minimum wages hlawh pha loa chhawr an ni dawn a; khawsak harsat avanga khawpuia pemlut a tih tam hle dawn bakah, Panchayat leh VC ten thuneihna an hloh dawn niin a sawi.
Congress hian 'MGNREGA Bachao Sangram' tia vuahin thil phut pali an nei a, heng zingah hian langtlang taka kalpui leh MGNREGA thlak lova a ngai anga kalpui leh Constitution-in a pek anga inhlawh theihna chanvo peklet bakah ram pumah minimum wages atan Rs 400 hman te a ni.
