TURNIPUI Dt. 02.02.2026 : 'Mizo Juda'' tia sawi, Bnei Menashe tia invuah mi 300 vel chu tun thla chhung hian Israel rama pem thla turin an inbuatsaih mek a. Aizawl-a Bnei Menashe hruaitute’n an sawi danin, Mizoram leh Manipur atangin mi 300 ve ve chu Israel-a pem thla turin an inpuahchah mek a, tun thla chawhnu lamah chuan India an chhuahsan thei turah an inngai.
Ram Thianghlim-a pem thla turte hi nikum December thla bul lam khan thlan an ni a, tunge pem tur tih chiah erawh chu hriat a la ni lova. Pem thei turte thlan tur hian Juda Rabbi 9 tiamin Jewish Agency for Israel mite leh Delhi a Israel Embassy atangin mi 35 vel Aizawlah ni 10 chhung an rawn cham a, pem thlak duhte chu an hma-ah hian an inlan a ni. Bnei Menashe hruaitute chuan pem thla tura thlan turte chu Bnei Menashe member a inziaklut, mipa an nih chuan serh tan tawh leh Juda sakhuaa inlet tawh an nih bakah Juda sakhaw serh leh sang an hriat thuk zawngte nen enfiah an ni a. Israel an thlen thlak tirh atanga chhuta thla 6 nung Passport neih a ngaih bakah Kristian an lo la ni ru reng em tihte pawh chik taka zir chian a ni a. Mizo Juda nihna a Israel rama lo pem tawh chhungte chu duhsak bik an nih tur thu an sawi bawk a ni.
Israel sorkar chuan tunhnai khan India ram hmarchhak, Mizoram leh Manipur a Mizo Juda mite, an rama pem thla duh mi 6,000 thelh chu kum 2030 ral hma a pem thlak a phalsak a. A tahtawla an pem thlakna turah tun thla hian a hlawm hmasa ber, mi 300 ve ve chu Mizoram leh Manipur atanga chhuk tura ruahmanna siam a ni a. Kal tur thlan chhuahte hi Rabbi-te hian an rawn puan thuai rin a nih thu Bnei Menashe hruaitu Jeremiah L. Hnamte chuan a sawi.
Mizo Judate hi tam tham tak Mizoram leh Manipur atangin an lo pem thla tawh a, kum 2005 a Isarel rama Juda puthiam lal zing ami Sephardi Chief Rabbi Shlomo Amar-in India hmarchhaka Israel hnam bo ni a inhriate Juda mi a a pawm atang khan pem thla an tam zual ta a ni.
