TURNIPUI Dt/ 02.02.2026 : Tun thla ni 17 atanga tan tur Assembly inkhawm atan bill a la lut lova House chhunga lehkha pharh tur 2 leh zawhna engemawzat a lut tawh.
Assembly Secretariat atanga thu dawn danin zawhna hi House chhunga chhan chi (starred question) 445 a lut tawh a, ziaka chhan chi (unstarred question) 193 a lut tawh bawk a. House dawhkana sorkar lehkha pawimawh dah (laying of papers) tur 2 lut tawhin sorkar atangin dan thar emaw dan dinglai siamthat tur emaw lut a la awm lo. Assembly Budget Session lo awm tur hun hman dan tur duangtu tur Speaker Pu Lalbiakzama hova Business Advisory Committee (BAC) hi January ni 28 khan thukhawm tura ruahman a ni na-in member, legislature party hruaitu hrang hrangte Aizawl a an awm remchan loh avangin an thu thei ta lova. Chuvangin BAC thutkhawm hun tur hi tunkar Ningani (February ni 5) ruahman leh a ni.
Assembly inkhawmah chuan budget session hian hun a duh rei ber ziah a, tihtur pangngai bakah a tlangpui a budget sawihona (general discussion on the budget) bakah Minister-te’n an department chanpual a sum hman tur sawiho (demand-wise discussion) a awm bawk avang a ni a. Sorkar bill a tam leh tlemin a rei zawng tur a hril thui hle bawk a ni.
