Dated Aizawl: the 26 February, 2026 : Vawiin khan Mizoram Cooperative Apex Bank Ltd. Board of Directors Meeting chu Head Office, Tuikual South-ah an thukhawm a. Meeting hi Pu Lalnunsanga, Chairman, Mizoram Cooperative Apex Bank Ltd. chuan kaihruaiin, Bank inrelbawlna hrang hrang thlirho bakah Bank Policy thar duan te pawm a ni.
Board Meeting hian a tarlan danin, Mizoram chhunga Society PACS hrang hrang te Computerization 1st phase atan PACS 24 computerized tawh niin tunah hian 2nd phase kalpui mek a ni a. PACS 25 dang computerized tura zawh tep a ni.
Vawiina Board Meeting hian Loan dilna 97 pek a remti a. Heng loan dilna hrang hrang te hi mimal leh pawl atangin Agriculture, Sumdawnna, Banakaih (Handholding) leh Biak In sakna loan te an ni a. A vaia Meeting-in Loan pekchhuah a remtih zat chu cheng vaibelchhe 27.30 a ni.
Tun dinhmuna Apex Bank-a deposit hi cheng vaibelchhia 1796 niin Loan pek chhuah hi cheng vaibelchhia 1263 a ni a. Sum kawl atanga Loan pekchhuah tehfung CD Ratio hi zaa 70% a ni mek a. Apex Bank hian Branch 35 nei mekin tun Financial Year hian Zemabawk leh Saipum ah te Branch thar hawn belh an tum a ni.
