TURNIPUI Dt. 21.01.2026 : Mizoram Police Raising Day vawi 54-na chu vawiin, January
21, 2026 dar 11:00 AM khan GS Arya Mess, Police Headquarters, Aizawl ah a
lawmna hun hman a ni a, Mizoram leh a chhunga cheng mipuite tana Mizoram Police
hnathawh leh inpeknate tarlan niin, infuihtharna hun hman a ni.
January 21, 1972-ah Assam Sorkar hnuaia Mizo District chu
Union Territory-ah hlankai a ni a. Tichuan Mizo District-a Assam Police awm
mekte chu Mizoram Police-a leh (convert) an ni nghal a. Mizoram UT sawrkar
thara IGP hmasa ber Pu I.J Verma, IPS chuan January 21, 1972 ah IGP Office a
luah tan a, hemi ni hi Official-a Mizoram Police Raising Day atana pawm a ni
zui ta a, January 21, 2026 hi Mizoram Police din champha (Raising Day) vawi
54-na chiah a ni.
Raising Day lawmna programme-ah hian Mizoram Police Unity
Band-in Mizoram Police Anthem sain hun an hawng a. Thusawi tha tak tak
ngaihthlak a nih bakah Mizoram Police mi hnathawk tha leh huaisen te hnenah
chawimawina tangkapui hlanna neih a ni.
Raising Day-a chawimawina hlante:
1). DGP’s Cash Reward for Bravery – Hei hi mi huaisen chawimawina a ni a, hlauhawm hnuaia mahni nunna thapa hna hlen chhuak te hnenah pek a ni. Driver Grade-II Lalremsanga leh Constable T. Lalhruaitluanga, Saitual DEF ve ve hnenah ramhnuai hmun khawkrawk taka misual tlanchhia um a, beih an tawh avanga hliam tuar chunga misual leh ruihhlo thahnem tak an man avangin hlan an ni. Dr. Ashok Malik, IPS, IGP (Armed) in a hlan a ni.
2). Kendriya Grihmantri Dakshata Padak 2025 – Ministry of Home Affairs-in ram pum huapa Intelligence leh Investigation lama mi chungchuangte a pek thin a ni.
Intelligence Category:
1) Inspector Lalchhuanmawia, CID (SB) leh
2) Head Constable C. Lalfakzuala, CID(SB) – Ruihhlo tawlhrukna, ralthuam tawlhrukna leh dan bawhchhiatna lian tham thleng thei vil kawngah thuruk pawimawh tak tak hre thei tura an hnathawh rintlak tak tak avangin he chawimawina hi an dawng a ni.
Investigation Category:
1) Sub-Inspector Samuel Lalramenkima, Mamit DEF – February
13, 2025-a Kobawi luia ruang chhar a nih atanga darkar 48 ral hmaa tualthattu
chhuichhuah a nih avangin he chawimawina hi pek a ni. Rinhlelh tur awm miah lo
case a ni a, chuti chungin a team te nen pawikhawihtu an chhuichhuah mai bakah
ni sawm chhungin a inhnamhnawih zawng zawng, mi pariat an man kim vek hman a
ni. Pi Meghna Yadav, IPS, IGP (Training) in chawimawina hi a hlan a ni.
2). Gallant Warriors Award 2024–25 – Ek Hi Rasta Trust
hnuaia ram pum huap chawimawina “Citizens’ Gratitude to Gallant Warriors” hi
mihuaisen hnenah an dam lai emaw, thih hnuin pek thin a ni. Kumin hian
Sub-Inspector J. Lalnghinglova, 1st Battalion, MAP, leh Constable C/627
Lalkhawngaiha, 1st Battalion, MAP, te hnenah helho nena an inkahnaah huaisenna
leh inpekna nasa tak lantir a, hliam na tak tuar khawpa an tan avangin hlan an
ni. Pu Seju P Kurruvilla, IPS, IGP (Crime) in a hlan a ni.
3). DGP’s Commendation Disc & Certificate 2025 – He
chawimawina hi department chhunga chawimawina sang ber zinga mi niin, hna thawk
tha thlan chhuahte hnena hlan thin a ni a. Pu Victor Zothansanga, MPS, ASP,
Champhai DEF, leh Pu Alan Hmangaihsanga, MPS, DSP (Hqrs.), Champhai DEF, te chu
Mizoram Police chanchina tum khata heroin tha chi man hnem ber record, tlang
20, Kg 7.422, cheng vaibelchhe 2.22 man hu manna kawnga sulsutu an nih avangin
hlan an ni. Pu Sharad Agarwal, IPS, DGP, Mizoram-in a hlan a ni.
4). Best Police Station of Mizoram 2025 – India ram pum huapin Ministry of Home Affairs chuan Police Station tha thlanna a nei thin a, objective crime data, quality of investigation, case disposal leh citizen feedback atanga tehin India rama Police Station te hi ranking pek an ni.
Kum 2025 atan Mizorama Police Station tha ber lawman chu
Vaivakawn Police Station, Aizawl District, hnenah hlan a ni a. Inspector
Zoramsanga, Officer-in-Charge, Vaivakawn Police Station, chuan Pu Sharad
Agarwal, IPS, DGP, Mizoram hnen atangin lawmman hi a dawng a ni.
Raising Day lawmnaah hian IPS leh MPS officer pension tawh
te bakah Pu Sharad Agarwal, IPS, DGP, Mizoram hnen atangin thusawi ngaihthlak a
ni.
