Dated Aizawl, the 18th February 2026: Directorate of Information & Public Relations buatsaih film tawi insiamsiakna ‘Mizoram Short Films Competition 2026’ chu, vawiin khan endiktu atana ruat mi 5 ten, I&PR Mini Theatre, Lianchhiari Run-ah endik hna an thawk tan. He film insiamsiak-ah hian film thehluh zat hi 41 niin Mizo film Insiamsiak awm tawh zawng zawngah tel an la tam ber tum leh film theh luh zat pawh a la tam ber tum nia hriat a ni.
Ruahman dan chuan February ni 24 hian Mizoram Short Film Competition 2026-a ti thate hnenah lawmman sem a ni ang.
Directorate of Information and Public Relations chuan March ni 12 leh ni 13 khian Chapchar Kut 2026 pualin I&PR Mini Theatre, Lianchhiari Run-ah Mizo Film Show an buatsaih leh dawn bawk a, hetah hian intihsiaknaa tel Short Film eng emaw zat bakah Mizo feature film-te chhuah tum a ni.
Hei bakah hian Mizoramin lemchan lama hma kan sawn zel theih nan leh film industry hmasawnna atan Directorate of Information and Public Relations chuan, Mizorama a vawikhatna atan March ni 16 – 18 hian ‘Lemchan-Mizoram Film Festival 2026’ a buatsaih dawn bawk a, hemi atan hian IPRP&S Secretary Pi Betsy Zothanpari Sailo kaihhruaina hnuaiah Festival Organizing Committee din a ni a; nimin khan a vawikhatna atan Organizing Committee hi, Festival Director Pi K Vanlalsangi, I&PR Director ni bawk kaihhruaina hnuaiah an thukhawm a, Film Festival kalphung leh kalpui dan turte an rel a ni.
