Tangka kum tharah central sorkar atanga Mizoram sum hmuh tur zaa 23.9 a pung tura chhut a ni.
Nimina Union Finance Minister Nirmala Sitharaman-i'n Union Budget a pharh takah chuan tun tangka kum kal lai (2025-2026) a Mizoramin sum a hmuh atanga chhuta tun tangka kum thar tur (2026-2027)-a central sorkar atanga sum a hmuh tur chu za zela 23 point 59 a pung tura chhut a ni a. Hei hi Finance Commission 16-na-in central sorkar leh state sorkar sum insem dan tura state-te'n za zela 41 an chan tur anga chhut a ni.
Mizoram hian central sorkarin chhiah chi hrang hrang atanga sum a dawn chu tun tangka kum kal lai-ah hian cheng vaibelchhe 6,964 leh nuai 85 a ni a. Finance Minister thusawi atanga a lan dan chuan tangka kum tharah hian Mizoram chuan cheng vaibelchhe 8,608 leh nuai 8 dawng tura chhut a ni a, a punna hi cheng vaibelchhe 1,643 leh nuai 23 ni tura ngaih a ni. Hei hian tun thla a Finance changtu Chief Minister Pu Lalduhoma'n assembly a a pharh tur tangka kum thara Mizoram budget pawh a tha zawnga nghawng lian tham a neih beisei a ni.
Hemi chungchang ah hian Economics lam mithiam Pu Huna Kawlvawm chuan Mizoram Sorkar tan thil tha tak a rawn thlen ngei dawn tih a chiang, a ti a, Mizoram tana chhinchhiah tlak tak Union Tax and Duties, India ram pumpui chhiah khawn-ah 15th Finance Commission in 0.500 a pek thin chu 16th Finance Commission -ah hian 0.564 in Mizoram chanvo a rawn tipung ta a, hmarchhak State zingah Mizoram leh Assam chiah hi 15th Finance Commission aia 16th-ah Central-a chhiah tlingkhawm chang tam tur zingah an tel tih a sawi a ni.
