TURNIPUI Dt.25.01.2026 : Mizoram sorkar chuan naktuka Republic Day lawmna-ah a tam thei ang ber tel turin mipui a sawm.
Republic Day vawi 77-na chu ram chhung hmun dang rualin naktuk hian Aizawlah pawh Lammualah lawmna hun hman a ni dawn a. Larsap Gen. VK Singh chu he hunah hian khuallian a ni ang.
Lammual-a Republic Day lawmna hi zing dar ah 9 ah tan a ni ang a, Khuallianin Hnam Puanzar a pawhparh hnuah Parade Contingent enfiahin, Republic Day pual lawmna March-Past-in a chhunzawm ang. Governor hnen atang hian Republic Day thuchah ngaihthlak a ni ang a. National/State Award leh chawimawina dangte semin a chhunzawm ang. Hemi hnu hian sawm bikte tan Lok Bhavan-ah Governor’s At Home buatsaih a ni ang.
He tih lai hian Aizawl Lammual a Republic Day lawmna turah venhimna khauh taka ruahman a ni a. Aizawl district SP Pu Zosangliana sawi danin sorkar hmun pawimawhah te uluk leh zuala venhimna kalpui a ni a, in chhawng sang te ngaihven zual bik niin Lammual leh Lok Bhavan chung zawnah drone thlawhtir khap a ni a. Lammual chhungah bomb kam ruk a awm leh awm loh pawh bomb senghawi thiamte’n uluk takin an enfiah reng a ni. Boruak muanawm tak hnuai a Republic Day lawmna kalpui a nih theih na’n Police te pawh ngawrh takin an duty a ni. Tun dinhmunah Aizawl a Republic Day lawmna tibuai thei tur boruak engmah a awm thu hriat a ni lo.
Mizoram District Hqrs -ah chuan Bawrhsap ten hnam puanzar pawtpharhin parade te chibai buk an chhang let ang a, SDO leh BDO thuthmun bakah Sorkar pisa leh Zirna Inah te hnam puanzar pawhpharh a ni bawk ang.
