TURNIPUI Dt. 05.02.2026 : MNF Legal Board chuan vawiin chawhma khan Chief Secretary Pu Khilli Ram Meena, Chief Secretary leh Chief Vigilance Officer ni bawk hnenah Indian Air Force (IAF) tana Lengpui ram lei chungchang CBI chhuitir turin an ngen.
An Vice Chairman Pu Lalpianfela Chawngthu hminga lehkha an thehluhah MNF Legal Board chuan IAF tana Lengpui rama mimal ram lak danah thil felhlel bakah tun sorkara thuneitu sangte'n pawisa tam tham tak an eiru-a puhin CBI chhuitir ngei turin an phut a. Tun sorkar ding lai-in kum 2023 December ni 23 a CBI te a tul ang ang chhui thei tura thuneihna (general consent) a pek chu kum 2024 June ni 27 a a hnuhkir leh tak avangin CBI-te koh luh hi an ngen tih an lehkha thehluhah chuan an tarlang a. CBI kher chhui an ngiatna chhan sawifiahin he thilah hian Chief Minister, Revenue Minister, sorkar officer lian leh politics a thiltithei mimal engemaw zat an inhnamhnawih ni a puhna a awm avangin Mizoram sorkar hnuai a thawkte chhui mai chi ni lova an ngaih thu an tarlang a ni.
MNF Legal Board chuan Lengpui rama mimal ram lakna atana cheng vaibelchhe 188 zet mipui sum hman a nih chungchangah hian tihdan phung felhlel satliah ni lovin tum lawk sa reng leh politics thuneihna hmanga inthuruala dik lo taka thuneihna hman sualna ni-in an puh a. Ram lak a nih dan phung hrim hrimah hian ram lakna dan hman lai Right to Fair Compensation and Transparency in Land Acquisition, Rehabilitation and Resettlement Act, 2013 (RFCTLARR Act) chu namnul a bawhchhiat a nih thu an ziak bawk a. Dan dinglai palzutna langsar tak tak a tam bakah, ram lak hna chu a bul tanna, Preliminary Notification tih chhuah atanga ni 70 chhung lekin engkim zawhfel vek a ni a, hei hi Dan zawm chung chuan thil theih loh tawp tura ngaih a ni a ti a, a buaipuitu Aizawl Bawrhsap Pisa leh sorkar hnathawk dangte chu Dan kalha thilti tur hian sorkar hotu leh mi thiltitheite’n an nawr lui ngei ni a a lan thu an sawi bawk.
Pu Lalpianfela Chawngthu chuan ZPM Media Committee Chairman hminga CBI-a FIR thehluh tumna awm nia sawi chu tlanchhe chunga mipui bum tumna-ah a puh a. Sorkar kalphung pangngai awm sa (proper channel) hmang ngam lova, rorellai party Media Committee Chairman hminga FIR thehluh chu thil kalphung a ni lo a ti a. CBI chhuitir tumna tak tak aiin politics thil taka hmai phihfai tumna a ni tiin, ZPM sorkar hian MNF Legal Board lehkha an thehluh hi bawhzui se, sorkar kalphung pangngai (proper channel) ngeia CBI te kuta a hlan an beiseiin, an umzui zel dawn niin a sawi bawk.
