Mizorama Myanmar raltlante kutze thla leh mitnaute hmanga chhinchhiahna hna thawh mek chu kar kalta chhung khan raltlan luh belh vangin hmasawnna a awm lo.
Mizoram Home department tarlan danin Champhai leh Hnahthial district-ah raltlan an luh belh avangin raltlan hi 237-in an pung chho a. Hemi avang hian Myanmar raltlan chhinchhiah zat hi za zela 89 point 94 atangin za zela 89 point 79-ah a tla thla zawk a. District dangah he hna thawhna-ah hian kar kalta chhung khan hmasawnna a awm lo a ni.
Kar hmasa hmasa lehah khan Myanmar raltlan hi 28,964 an awm a, kar kalta Zirtawpni khan mi 29,201-ah an pung chho a. Champhai district-ah raltlan 231 luh belhin Hnahthial district-ah mi 6 an rawn luh belh bawk a ni. He tiang a nih avang hian Champhai district-a raltlan awmte biometric enrolment zawh vek tawh anga puan chu za zela 99 point 82-ah a tla thla leh ta a. Mizoram puma biometric enrolment tihfel tawh zat pawhin a tlakhniam phah ta a ni.
