TURNIPUI Dt. 23.01.2026 : Tuihna humhalh leh a awmsa tihpung turte, faina leh fai duhna thinlung nena changkanna lamtluang zawh turin vawiin khan PHED leh Central YMA chuan kum hnih (2) chhung atan thawhdunna thuthlung an ziak a. PHED E-in-C pisaah Er. Zodinthari, Engineer – in – Chief, PHED leh Pu R. Lalngheta, President, Central YMA te chuan hming an ziah hnan a ni.
PHED leh Central YMA chuan tuihna humhalh leh a awmsa tih pun thupuiah neiin Kum 2012-2025 chhung thawh dunna hlawhtling tak hman a ni tawh a. Kum 2017-2025 chhung hian fai leh thianghlim inzirtirna chungchangah thawh dunna hlawhtling tak hman a ni tawh bawk.
Thawh dunnaah hian tuihna humhalh leh a awmsa tih pun chungchangah te, fai leh thianghlimna kawngahte rah duhawm tak tak hmuh chhoh mek a ni a. Hmabak tamtak a la awm avangin kum hnih (2) dang thawh dun leh ṭha-in an hria a, Mizoram sawrkar-ah thlen niin; Mizoram sawrkar-in kum hnih (2) chhung atan PHED leh Central YMA thawh dun chu a rem tihsak leh ta a ni
(Letter No. Comp. No. 19051 No. M-13/ 566/ 2025-PUB-ADMIN-PHED Dt.15.1.2026).
