TURNIPUI Dt. 25.01.2026 : Central Young Lai Association (CYLA) Lawngtlai chuan naktuk Republic Day 26th January, 2026 hian Lawngtlai District chhungah tiam chin awm lovin Total Bandh an huaihawt dawn.
CYLA hian nimin khan Emergency Meeting neiin thuchhuah an siam a. 12th Lai Autonomous District Council-a MDC General Election neih zawh takah Sorkar-na siam thei an awm reng chunga ni 45 ral hnuah pawh Mizoram Sorkar atanga Approval tihchhuah loh chungchanga Central YLA hmalakna chuan awmzia a neih loh avangin Central YLA Emergency Meeting chuan ngun takin a ngaihtuah a, kan ram leh hnamin Sorkar mumal kan neih loh avanga harsatna kan tawh zawng zawngte leh mipui tawrhna leh harsatnate avangin Sorkar mumal rang taka kan neih theih nan na zawka hmalak tha kan ti a. Dt. 26th January, 2026 Thawhtanni Zing dar 5:00 AM atangin Lawngtlai District chhungah tiam chin awm lovin ‘Total Band’ neih nise tiin kan rel a ni, an ti.
Lawngtlai District chhunga YLA Sub Hqrs/ Group leh Branch zawng zawngte mahni area-ah theuh 'Total Bandh' hi kalpui turin kan in hriattir a, LADC-ah Sorkarna mumal a awm theihna tura Central YLA hmalakna kal mekah mipuite thawhpuina kan ngen a, a tul ang zelin Central YLA chuan hma kan la dawn a ni, an ti bawk.
