Saitual 18 February 2026 : Vawiin khan District Bawrhsap Pu Srinivas Sadi kaihruaiin Saitual DC Conference Hallah Saitual District-a Chapchar Kut 2026 lawm dan tur rel a ni.
Hun kaihruaitu Pu Srinivas Sadi chuan kalkhawmte hnenah lawmthu sawiin, Mizoram Sawrkarin Chapchar Kut hmanna pui ber Aizawla hman dan tur ruahman leh District Khawpui tana sum hman tur ruahmanna a siam te a tarlang a, kum kal ta 2025 a Saituala Chapchar kut hman dan te thlir chungin kum 2026 Chapchar Kut hman dan tur rel chhunzawm a ni.
Kalkhawmte hian Saitual District-a Chapchar Kut hmanna pui ber chu March ni 13-ah Saitual Vantlang Khelmual a hman an rel a, Kut Pa atan Mizoram Legislative Assembly Speaker Pu Lalbiakzama sawm ni se an ti a, Kut Thlengtu atan District Bawrhsap Pu Srinivas Sadi an ruat a, Chapchar Kut thupui atan Zonun Zemawi Inremna ni se tih an rel a ni.
Kalkhawmte hian Chapchar Kut 2026 hmanna tura ruahmanna lo siam tur Organising Committee dinin an ni hian mawhphurhna leh chanvo hrang hrang nei tur te pawh ruahman nghal tura tih an ni a, an ruahman hrang hrang te March ni 3 thutkhawm lehah thlirho ni se tih a ni.
Kalkhawmte hian Chapchar Kut chu mipuite hlut theih zawnga hman an duh thu an sawi a, Mizo zia rang pho lang thei chi hrang hrang te nen a hun hman ni se, Kut Lanu, Kut Val leh Kut hraite thlan rel a ni bawk.
Charchar Kut 2026 hman dan tur relnaah hian Office hrang hrang hotute, Town Area a VCP te,
Sub Hqrs YMA OB, Sub Hqrs MHIP & District MUP aiawh bakah Town Area a Branch YMA aiawh leh thuthar thehdarhtute an tel a ni.
Organising Committee O.B atan heng mite hi ruat an ni:
Chairman : Pu R.Lalruatkima President Sub Hqrs YMA
Vice Chairman : Pi C. Lalhmingsangi DUDO
Secretary : Pu Lalnunpuia Superintendent DC Office
Asst Secy : Pu K. Lalsiamtluanga Secy Sub Hqrs YMA
Treasurer : Pi Lalbiaktluangi President Sub Hqrs MHIP
Kut Lanu, Kut Val leh Kut Hraite endik turin Sub Hqrs YMA, MHIP, District MUP, SJA aiawh te leh Town Joint VCP ruat a ni.
