Saitual, the 18th February, 2026: Vawiin khan DC Conference Room, Saitualah District Cooperative Development Committee (DCDC) chu an chairperson, District Bawrhsap ni bawk Pu Srinivas Sadi kaihhruainain an thu khawm.
He hunah hian DCDC chairperson Pu Srinivas Sadi chuan thu sawiin, MPACS chu thingtlang mite hmasawnna atana Sawrkar laipui hmalakna pawimawh tak a ni, a ti a, MPACS din thar tur zawn ai chuan Society awm sa MPACS a chantir tura hmalak a pawimawh tih a sawi bawk. Bawrhsap chuan Saitual District-a Cooperative Society awm sa zawng zawng te chu zir chiang a, MPACS an nih theihna kawnga hma lakpui turin DCO te, NABARD te bakah line department te chu a sawm a ni.
Vawiin thutkhawmah hian DCDC chuan MPACS hnuaia tuialhthei dahthatna tur dilna (Non-bulk storage license of Petrol and Diesel) chungchang a ngaihtuah a, hmun pathum Khanpui, Sihfa leh Phullen-ah te endik tawh niin bawhzui tura rel a ni. Thanglailung, Saitual, Lailak leh N. Lungphera MPACS pali din thar chungchang sawiho niin heng MPACS thar te hi computerised tura tih an ni bawk. NCD Portal-ah hian cooperative data chu update thin a ni a, hei hi DCDC hian a hriatpui bawk a ni.
DCDC hnuaiah Joint working committee din a ni a, an ni hian Saitual District chhungah MPACS dinna tur khaw 20 an thlang chhuak a, heng khuaah te hian MPACS chungchang inzirtirna leh inhrilhfiahna ‘awareness campaign’ kalpui vek tawh a ni. Heng khaw zingah hian N. Lungpher chu ziahluh (registered) tawh niin Buhban leh Lenchim te chuan dilna an thehlut tawh a, Saitual hian society awm sa MPACS a inlehna tura dilna an thehluh tawh bawk a ni.
Vawiin thutkhawm hi Pu Srinivas Sadi, Saitual Bawrhsap & DCDC Chairperson-in a kai hruai a, Pi H. Lalhmachhuani, District Development Manager (DDM), NABARD & DCDC member secretary, Pu Lalthangfala, DCO & Convener, DCDC Saitual District te bakah hian DCDC member te an tel a ni.
