Director, School Education Department, chuan January ni 15,
2026 Ningani khan thuchhuah siamin, School Education Department, Mizoram Sorkar
hnuaia School awm zawng zawnga School naupangte chu tunlai thlasik khawvawt na
tak avangin an uniform bakah thawmhnaw lum dang hak phalsak an ni.
Circular an tihchhuahah chuan, “Kan khawvel sik leh sa in her danglam zela thlasik na takte kan tawn chhoh zel avangin, sikul naupangte hriselna leh hmakhua thlirin, School Education Department, Mizoram Sorkar hnuaia school awm zawng zawng – Government, Government Aided leh Private School te chuan school uniform bakah thawmhnaw lum, school naupangten an hak phalsak turin kan inhriattir a. Chuvangin school zawng zawngten naupangte lum nan school uniform an hak piah lamah stockings, leggings, thermal thawmhnaw leh thawmhnaw lum dangte hak an phalsak thei a. Rualkhai zawka uniform zahawmna kenkawh a nih theih nan, thawmhnaw lum te hi zahawm leh school nena inrem a ni tur a ni a. Tin, a rawng pawh rawng thim lam (entir nan, a dum, a pawl tak, vutbuak rawng) hak theih nise, rawng thlan chungchang hi chu school zalenna a dah a ni a. School thuneituten uniform piah lama thawmhnaw dang naupangten mahni intih lum nana an haka vanga thil hrang hranga inthleina awm lo tur bera uluk taka kengkawh tura ngen leh hriattir kan ni e. He thuchhuak hian tun thlasik chhung, ni 27 February, 2026 thleng emaw, he Directorate atanga thu leh awm hma chu School zawng zawngten an zawm thei a ni tih kan inhriattir e,” tiin Angela Zothanpuii, Director, School Education Department chuan hming a ziak a ni.
