Dated Serchhip, the 18th February, 2026: Vawiin khan Serchhip DC Pu Paul L Khuma hoin Serchhip DC Meeting Hall ah Town Sanitation Task Force an thukhawm.
Sawrkar leh Green Herd SP te nen thawk hoin Serchhip District chhung khaw hrang hrangah leh Serchhip town area hmun thenkhatah bawlhhlawh khawnkhawm leh sawngbawl hna thawh mek a ni a. Green Herd SP ten bawlhhlawh an la khawn theih lohna khua hi Serchhip khawpui pawn ah chuan khaw 5 chauh a awm tawh a. Serchhip khawpui chhung bikah New Serchhip area chin chu bawlhhlawh thliar leh sawngbawl mek a ni tawh a ni. Green Herd SP te hmalak dan thlirho niin an harsatna tawh dan te leh chinfel dan tur te sawiho a ni a. Serchhip Lungrual Muala bawhhlawh sawngbawlna hmunah hian khawl hmanga bawhhlawh tih ral te, a hralh chhuah theih ang hralh bakah hralh tlak loh te pawh Mizoram chhunga cham bang loa tihral a nih thu ngaihthlak a ni.
Chhiahtlang khawtlang hruaitute atanga thu lut bawlhhlawh thliar leh khawn dan chungchang chu meeting chuan Green Herd SP te nena ruahmanna thar siam turin a rel a, thutlukna felfai tak an neih hnuah Committee hnenah an hriattir leh dawn a ni. Serchhip Vengchung VC area a bawlhhlawh paihna hmun an hman mek pawh hman chhunzawm a rem tawh dawn loh avangin UD&PA Department te nen inberawnin ruahmanna siam ni se, tiin an rel bawk.
Bawlhhlawh paih dan chungchang te, tawih thei leh thei lo thliar chungchangah te ngawrh lehzuala mipui zingah inzirtirna kalpui chhunzawm zel ni se, tiin meeting chuan a rel a. DLAO, PHED leh DRDO te nen tanghoin khawtinah Gram Sabha hmangin zirtirna kalpui ni se, tiin meeting chuan a rel. Tlawmngai pawl hrang hrang YMA, MHIP, MUP, chanchinbumite leh pawl dang te pawh mahni remchanna apiangah bawlhhlawh thliar leh paih dan chungchang inzirtir tura ngen an ni bawk.
Sawrkarin bawlhhlawh paihna hmun tura a siam hmun bik ni lo, hmun danga bawlhhlawh paih hi dan bawhchhiatna a ni tih sawi lan nawn leh a ni a. Dan anga hrem theih an nih thu leh hetiang lo ti thin an awm chuan, thuneitute hnena thlen zel turin Sanitation Task Force meeting chuan a ngen a ni.
