Dated Siaha, February 19, 2026: Vawiin chawhma dar 10:30AM khan DC Mini Conference Hall, Siahaah District Cooperative Development Committee an ṭhukhawm a, Pu VL Hruaizela Khiangte, Chairman, District Cooperative Development Committee leh Bawrhsap nibawk chuan he hun hi a kaihruai.
Pu VL Hruaizela Khiangte chuan member-te kokim taka an tel thei chu lawmthu sawiin, committee pawimawh tak anih avangin a hun takah ṭhutkhawmna neih ziah ni se a duh thu a sawi. Chairman-chuan Society din chu mipui harsatna sutkian leh an mamawh phuhruk sak bakah pawlin hlep tlêmte an lo nei ve theihna a ni tih sawiin, ‘Pawl din kan awlsam ang aiin thawhho kan thiam leh tlat ṭhin lo hi inenfiah kan ngaihna lai niin a lang,’ a ti. ‘Kan tihluai a, mumal takin kan kal chho dawn ṭan tihah pawl (society) tihchakna tur sum leh pai a lo awm a, mimal ta tur emaw tih mai a awl ṭhin; hlawk nghal hluai tum lovin nakin hun thlir chungin daihrei kan zir a ngai a ni,’ tiin society nihphung pawimawh tak a sawi.
Mizoram Cooperative Societies Act and Rules hnuaia la inziak lut lo pawl ding zawng zawng chu inziak lut vek tura hriattirna lehkha pek ni se tih a ni a, District tinah Multipurpose Primary Agriculture Credit Society sawm (10) tal din belh tura ngenna lehkha dawn chu Siaha district enkawltu tur (Resource person) National Bank for Agriculture and Rural Development (NABARD)-in an lo dah hunah chak zawk bawhzui nise tih a ni bawk.
Vawiin ṭhutkhawmah hian District Cooperative Development Committee member-te an tel a, Chairman Pu VL Hruaizela Khiangte chuan member-te chu mi tinte thawhhopui thiam tura chahin, ‘Mipui tana thawk kan ni tih inhre thar leh ila, hna kan thawh chuan mi zawng zawng hriat leh hmuh theih tûrin kan thawkrim tur a ni, awm mai mai a thiang lo.’ tiin ‘Pawl (society) hrang hrang dingte hmalakna vil leh enzui kawngah mawhphurhna an neih thu a sawiin lawmthu sawina a nei a, ṭhutkhawm ṭin a ni.
