TURNIPUI Dt. 05..02.2026 : Ministry of Defence hnuaia awm, National Defence College-a intuaihriam mek India leh ram dang sipai officers; Mizoram rawn tlawha lo zin mekte chuan Mizoram nuam an tih thu Chief Minister Pu Lalduhoma hnenah vawiin khan an thlen a. Ram mawi tak a nih bakah a ralmuang a, mipuite an nelawm a; Mizoram hian tlawhtu a la ngah deuh deuh dawn a ni, an ti.
Chief Minister chuan, Understanding India Study Tour neia Mizoram tlawha lo zin sipai officer te hi lawm thu a lo hrilh a. Mizoram chu state ralmuang, ziak leh chhiar thiam vekna, eirukna tlemna, khualzinten nasa taka an tlawh mek a nih thu a hrilh. Aizawl chu lirthei tam hle mah se khawpui reh riai mai a ni a, hmeichhia leh naupangte tan pawha khawpui ralmuang tawk tak a ni. Tin, in kal velnaah kawng sirah Nghahloh Dawr in hmuin ka ring a. Nghahloh Dawr hian kan ram ralmuanzia a tilang ve a ni, a ti.
