Aizawl, 27th February, 2026 : Vawiin Assembly session chawlhlawk lai khan Land Revenue & Settlement Minister Pu B. Lalchhanzova’n Directorate of Land Revenue & Settlement ah LR&S Department in Surveyor 14 a lak tharte chu a kawm.
Pu B. Lalchhanzova chuan Revenue Department chu department tawp, eirukna leh hlemhletna tamna leh a thawktute pawh dawr harsa tak anga hriat kan ni thin a, hei hi thlak tumin hotu lian ber atanga district office zawng zawngahte tan la in kan insiam tha mek a ni a ti a. Revenue Department mipuiin min thlir dan tam zawk chu mipui nena in dawr hnai ber Surveyor te kutah a awm tih sawiin, Minister chuan kan insiamthat kawngah hian a hma hruaitu ni turin kan surveyor thar te hi kan beisei che u a, in lakah kan thikthu pawh a chhe dawn hle a ni, tiin hnuhma tha hnutchhiah turin a chah.
Pu Chhanzova chuan Sawrkar hna tha tak an neih chu thil danga thleng an phal loh a rin thu sawiin mi chan ai chuh te, compensation lakna tura rinawm lo taka thil tihte, ram tehna a lo tlak zeh ve phette, sawrkar a ram surrender tur ram tehnaa a neitute nena lo in siamrem puia report diklo pekte leh eirukna lam rawng kai reng renga inhnamhnawih lo tur leh; an nun uluka ruihlo laka in vawng tlat turin Surveyor tharte chu a chah a. Helam kawnga an seniorte harhvang deuh an lo tawng palh a nih pawhin an hnung zui lo ngam turin a chah. Sawrkar thar a awm hnua surveyor lut tharte chu Surveyor chhuanthar; dikna leh felna kengkawh tute nitura an beisei thu Minister hian a sawi bawk. Minister chuan Revenue Departmentin inthenfai hna an thawh mekah diklo taka thiltite an laka evidence tha tawk tak a awm chuan an dim dawn loh thu sawiin, complaint dan tur dik taka complaint awmte chu an bawhzui zel thu a sawi a ni.
Surveyor indaihlohna hriain Chief Ministerin mi thar 14 lakna tur a phal sak chu lawmawm a tih thu sawiin, Minister chuan MPSC lamin felfai leh rang takin hma an laknaah lawmthu a sawi a. Recruitment Rules chungchanga court kal an awm avanga surveyor tling tharte appointment an pek mai theih loh dan te leh chu buaina chinfel a nih ruala District hrang hranga post tura surveyorte’n training an zo thei chu lawmawm a tih thu a sawi. Minister chuan Surveyor dang 30 lakna tur exam pawh zawh fel a ni leh tawh chu lawmawm a tih thu sawiin, mipui mamawhna a san em avangin MPSC pawhin result rang takin peih sak vat thei se a lawmawm tur thu a sawi bawk.
