Congress Thalai Hqrs - Mizoram Pradesh Youth Congress Committee chuan vawiin khan thuchhuah siamin, ZPM Thalai Headquarters hian JAC on National Highway, Kolasib hnenah ngaihdam dil rawh se, an ti.
MPYCC thuchhuahah chuan, "Kolasib District chhunga tlawmngai pawl hrang hrang intelkhawmin an din Joint Action Committee on National Highway ten NHIDCL chunga an lungawilohna an lantir chungchangah ZPM Thalai Headquarters chuan Opposition Party-te fuihpawrh theiha ngaia demna thu an chhuah chu Congress Thalai chuan mak a tiin, zahthlak a ti tak zet a. A rang thei ang bera JAC on National Highway-te chungah ngaihdam dil turin Congress Thalai chuan a phut a ni," an ti a.
"ZPM Sorkarna hnuaiah hian kum 2 chhung Mizoram hmun hrang hrangah inkalpawhna kawngpui a chhe em em vek a, lirthei neitute an mangangin sum leh pai pawh an seng thlawn nasa tawh hle a. Kawng tha duha thahnmengaia hmalatute thlawpa hnehin ZPM sawrkar chuan lirthei khalhtute leh neitute pawh vawi duai lo ti thlabarin lung inah hial a lo khung tawh a ni. Hetih mek lai hian Kolasib District chhunga mipuite mangang au rawl chuan Kolasib Thalaite ko chhuakin, Joint Action Committee on National Highway dinin hma an la ta a. An pute mualphona tur chu ngai ngam lovin ZPM Thalai Hqrs chuan Opposition te fuihpawrh theih kawngzawh tiin an deusawh ta a ni. Opposition te fuihpawrh an nih lohzia JAC on National Highway chuan thuchhuah meuh siamin ZPM Thalaite hi na takin an chhanglet hial a nih kha."
"Hetiang hi thil awm dan a nih avangin Congress Thalai chuan ZPM Thalaite chet dan chu zahthlak a ti hle a, JAC on National Highway hnenah a rang thei ang bera ngaihdam dil turin kan phut tlat a. An tihlawhtling duh lo a nih chuan tlawmngai pawlte ngaih pawimawh lohna leh inpalzutna nasa takah Congress Thalai chuan a ngai dawn a. Tin, tun hnuah hetiang thil a thlen leh MPYCC chuan a duh lo takzet a, ZPM Thalaite chu insiam tha tawh turin a chah a, thudik lo leh dawta inbeihnate pawh sim hmak turin ZPM Thalaite chu Congress Thalai chuan a beisei nghal bawk a ni," an ti.
